Hrafnagilsskóli

Þær Aldís Lilja Sigurðardóttir og October Violet Ylfa Mitchell í  4. bekk sýndu nokkrar tilraunir á samverustund í morgun. Þær skutu m.a. lítilli eldflaug á loft með því að blanda saman ediki og matarsóda og framleiddu rafmagn með hjálp sítrónu og sinkplötu. 

Í dag var sýnismöppudagur í skólanum hjá 1.-4. bekk, 6. og 8. bekk. Nemendur safna sýnishornum af verkefnum vetrarins og sýna þau foreldrum á þessum degi. Börnin sjá sjálf um að kynna verkefnin og í lokin skrifa foreldrar umsögn um barnið sem geymd er í möppunni. Þetta eru ánægjulegar stundir og gefa foreldrum betri innsýn í það sem börnin eru að vinna í skólanum.

Búið var að ráðgera að hafa áheitaverkefnið á morgun 16. maí en þar sem snjór er yfir öllu og veðurspá leiðinleg ætlum við að fresta verkefninu þangað til um miðja næstu viku. Við látum vita nánar þegar dagurinn er ákveðinn.

Árshátíð yngsta stigs var haldin fimmtudaginn 3. maí í Laugarborg. Heppnaðist hún vel í alla staði, allir nemendur tóku þátt og réði litagleði sem og almenn ánægja för. Hér fylgja nokkrar myndir frá sýningunni.

Lið 9. bekkjar sem þátt tók í BEST-stærðfræðikeppninni fékk 1. verðlaun fyrir bekkjarverkefnið með sólblómunum sem sjá má hér að neðan og lentu í 2. sæti í stærðfræðikeppninni sjálfri sem lauk núna um hádegið. Lið Hagaskóla sigraði með 23 stig en Hrafnagilsskóli fékk 22 stig. Í liðinu okkar voru Arna Ýr Karelsdóttir, Fjölnir Brynjarsson, Heiða Hansdóttir og Jakob Atli Þorsteinsson og fá þau bestu hamingjuóskir með frábæran árangur sem og allur 9. bekkur fyrir vönduð vinnubrögð.

Nú stendur yfir lokahluti BEST-stærðfræðikeppninnar sem er haldin í Kópavogi 3. og 4. maí. Lið Hrafnagilsskóla er komið í úrslit keppninnar ásamt tveimur öðrum liðum og verða úrslit kunn um hádegið í dag. Þessi keppni er árviss og fá allir 9. bekkir landsins tækifæri til þátttöku. Í ár skiluðu yfir 50 skólar verkefnum, 14 lið voru valin til þátttöku í lokakeppninni og þrjú þeirra komust alla leið í úrslitin í dag. Fulltrúar okkar eru þau Arna Ýr Karelsdóttir, Fjölnir Brynjarsson, Heiða Hansdóttir og Jakob Atli Þorsteinsson. Kennari þeirra og umsjónarmaður með verkefninu er Björk Sigurðardóttir.

Líkanið sem sent var í keppnina	Jakob, Fjölnir, Arna og Heiða	9. bekkur